Almmuhus – Stipeandaortnet sámegielat oahpaheaddjiide ja buohccidivššáriidda skuvlajahkái 2019/2020
Unjárgga gielda gullá sámegielaid hálddašanguvlui ja danin mis lea erenomáš stuorra ovddasvástádus dáhkidit sámegielat bálvalusaid gieldda ássiide. Vai mii hásttuhit ja movttiidahttit sámegielat oahpaheaddjiid ja buohccidivššáriid boahtit deike bargui, de lea gielda várren kr 250 000,- stipeandaortnegii.
Juolludaneavttut stipeandda ohcamii:
Sámegieloahpaheaddji:
-ahte don leat gazzamin oahpu, mii dagaha ahte leat dohkkehuvvon bargat oahpaheaddjin vuođđoskuvllas
-ahte don máhtát sámegiela nu ahte sáhtát oahpahit sámegiela vuođđoskuvllas
Buohccidivššár:
-ahte don leat gazzamin oahpu, mii dagaha ahte leat dohkkehuvvon bargat buohccidivššárin
-ahte don máhtát sámegiela
Juohke studentii sáhttá juolluduvvot stipeanda kr 25 000 juohke skuvlajahkái, dainna eavttuin ahte stipeandaortnega ruhtadeapmi lea sajis.
Maŋŋá go leat geargan oahpuin, dus lea guokte jagi čatnanáigi Unjárgga gielddas. Jus čatnanáigi rihkkojuvvo, de fertet máksit ruovttoluotta stipeandda(id) maid leat ožžon.
Eavttut dutnje guhte ozat stipeandda:
Ohcamuša mielddusin bijat čuovvovaš duođaštusaid:
- Oahpu namma ja man galle oahppočuoggá oahppu addá
- Duođaštus ahte leat máksán lohkanbadjedivvaga
Čálalaš ohcamuša oktan gáibiduvvon duođaštusaiguin sáddet e-postii postmottak@nesseby.kommune.no. Ohcamuš merkejuvvo «stipeandaortnet sámegiellagiidda/samisk stipendordning».
Ohcanáigemearri skuvlajahkkái 2019/2020 lea vuossárgga 6.7.2020.